شارك برأيك لحل مشكلة التحرش

منذ فترة طويلة تؤرقنى مشكلة التحرش الجنسى فى مصر بشكل كبير لدرجة انها من الاشياء الاساسية اللى لازم افكر فيها كل يوم ...
وبالتحديد اكتر موضوع المعاسكات اكتر من التحرش لاعتقادى ان التحرش مش محتاج تفكير (اعنى بالتحرش الاعتداء على البنات بشئ اكثر من الكلام .. يعنى لمس او المشى ورا بنت)
اعتقد ان اى حد يشوف تحرش بالطريقة دى لازم ما يسكوتش ويحاول انه يجذب انتباه الناس اللى حوالىه علشان لا يتحول الموضوع الى مشاجرة سخصية ...
المهم اللى بيشغلنى اكتر المعاكسة بالكلام ... هل تستحق فعلا انك تتدخل وتمنع اللى بيعاكس من اللى بيعمله..
فى ناس رأيها انه مش لازم الشخص ده نديله اهتمام اكتر من الازم لانه شخص تافه والكلام معاه بيديله اهمية وممكن يستحلى الموضوع اكتر ...
انا ليه رأى مخالف . ... ايوه هو تافه ومالوش لازمه بس لازم يكون فى وسيلة ردع علشان يبطل .....
بس لو انا اكلمت مع كل واحد قال كلمة لبنت ممكن اتخانق كذا مرة فى اليوم وده حل مش عملى لانى هازهق وهأقصر الشر .... وده اللى بيحصل فعلا
اوقات بييقى عندى طولة بال وبتكلم وبيردوا عليا ب " ما لكش دعوة " " هى اشتكتلتك " " انا ارضاها عليا ما انا عارف ان امى واختى بيتعاكسوا عادى"
اوقات تانية ببقى متعصب واتخانق واحس انى غبى وماحلتش حاجة ...
وبعد تفكير كتير توصلت لحل مفاده ان الحل يبدأ من عند البنات انها ماتسكتش لمل حد يعاكسها ... مش قصدى انها ترد على اللى بيعاكسها .. انا قصدى انها تقول لحد من قرايبها .. اخوها ابوها ابن عمها خطيبها ...
انا شايف انا الموضوع ده ليه مميزات وليه عيوب ..
عيوبه ان البنات مش بتحب المشاكل ولكن السكوت على اللى بيعاكس بالكلام هو اللى بيخليه يطور للتحرش
عيب كمان ان فى بنات بتتعاكس فى الشارع من شخص ماشى ولكن فى بنات كتير بتتعاكس من ناس فى نفس المنطقة ومن اصحاب محلات وان هى ديه الناس اللى بتعاكس وهى ماشيه وان حل الخير هيحل الاول .
مميزاته بقى ان الشخص اللى بيعاكس هيترعب لما يعرف ان اللى بيكلم معاه ده اخوها او ابوها
كمان مساحة التضامن معاه هتبقى عالية جدا .. ومش هتلاقى ناس تدافع عنه حتى من معارفه
لان الناس فى مصر عارفين ان اي حاجة لها علاقة بالشرف مافيهاش هزار
كمان لما اللى بيعاكس يبقى عارف انها هتقول لحد من اهلها هيفكر الف مرة قبل ما يعاكس
كمان مافيش حد هيكسل يتكلم علشان بنته او اخته
وكده تكون المشكلة اتوزعت على مساحة اكبر ومش على نسبة صغيرة من الناس ...
جزء كبير جدا من الموضوع ان البنات لا تسكت لما تتعاكس ... انا اعرف واحدة اتعاكست مرة وهى ماشىة مع خطيبها ولم تقوله علشان المشاكل ..
انا عارف ان مشكلة زى ديه مسؤلية الامن اللى انصرف من امن الناس الى امن النظام لدرجة ان الناس مش بتحط الشرطة كحل فى المشاكل
بس معلش لازم الناس كلها تتعامل لحد ما ربنا يفرجها من عنده
لو سمحت اذا كنت وصلت للجزء ده من المقال فادينى رأيك بالسلب او بالايجاب

ساعات الملل برده بيبقى مفيد

ساعات الملل برده بيبقى مفيد
على الاقل بيديك فرصة للتأمل( اللى انا قريت ان نصف ساعة من التأمل ممكن تسيبك بقية اليوم صافى البال...اشك)
المهم انى كنت فى البيت مش لاقى حاجة اعملها .
كتاب ....لا لا ما ليش نفس ......طب اذاكر شوية .... مصدع ومش قادر اركز......... اتفرج على فيلم خفيف..... مكسل اقعد ساعتين قدام الكمبيوتر.... خلاص
بابا صحى من النوم وقاللى ان فيه ماتش الاهلى وغزل المحلة .....شغال اتفرج.
المهم ان الملل ادانى الفرصة انى افكر فى هوامش الماتش ومش فاكر انى كنت مركز فى الكورة اوى ..

اول هام:
جذب انتباهى ان الاهلى بيلعب بجون جديد "احمد عادل " وان امير عبد الحميد كان قاعد على الدكة..
ان بصراحة عندى تعاطف كبير مع امير عبد الحميد مش عشان مستواه لانى مش بعرف اقيم اداء لاعبى الكورة ... علشان حظه مس موفق وموقفه ضعيف وده سبب كبير عندى انى اتعاطف معاه وادافع عنه ...
ساعات بحس ان ده ضعف من ناحيتي واحساسى الدائم باحتمالية الفشل وعلى رأى المثل "قدم السبت تلاقى الاحد" ... المهم مش ده الموضوع..... الموضوع ان المصور كان مضايقنى اوى .
حسيت انه فقيع وفلاح تصوير او بمعنى تانى حافظ مش فاهم..
كل ما الجون الجديد يصد كورة يجيب الكاميرا ويثبتها على امير ....ماشى ... مرة واتنين وتلاتة ... خلاص يا عم .
قعدت افكر فى احساس امير عبد الحميد. اعتقد انى اى شخص طبيعى مش هيبقى مبسوط (بغض النظر عن كل الكلام الكبير بتاع روح الفريق )لأناى تألق للمنافس اللى فى نفس الجبهة بيقلل من حظوظه وبيبن مساوءه ..... على الرغم من امير عبد الحميد كان بيسقف كا ما الكاميرا تجى عليه ....اعتقد انه كان بيسقف علشان الكاميرا جت عليه..... انا مش قصدى ان امير ينفسن ولكن انا شايف ان الانسان فيه نقاط ضعف غير قابلة للتفادى......

تانى هام:
المعلق قال ان المحلة باع جميع الاعبين ال 12 بتوع الموسم اللى فات مع انه فى استقرار مادى واللعيبة كان
محتاجها......
لما فكرت فى الموضوع لقيت انه تفكير عظيم....
المحلة مش بينافس على الدورى ولا عمره هينافس ....
ايه الفرق انه يطلع ال5 ولا يطلع ال11 .... اعتقد ان اهم حاجة انه لا يهبط...
فاحسن تفكير انه يبيع اللاعبين ويستفيد بالفلوس ويجيب 12 ناشئ عندهم حماس للعب ....
احسن من اللاعبين القدامى اللى بيدلعوا وبيتلالو فى المحلة ... ويقعد يقولك اصل الاهلى بيغرينى والزمالك عايزينى فى الحلال والكلام ده...
وهكذا... لما اللاعبين الصغيرين يكبروا يتباعوا وهكذا ... يفضل المحلة مش مهم الكام والنادى بيكسب واللاعيبة الصغيرة تلعب وهكذا.....

د/ هاوس: انطباعات طبيب مصرى عن البطل الامريكي

عندما بدات الكتابة على هده المدونة كنت اعتقد ان اغلب ما سأكتبه سيكون خارج النطاق الطبى ولكننى فوجئت بأن الموضوعات التى تثيرنى للكتابة تكون متعلقة بالطب ,ربما يكون دلك نتيجة اننى شخص حديث العهد بالمستشفى التى تستحود على قدر كبير من تفكيرى .
ما علينا....
اثناء مشاهدتى لمسلسل د\هاوس المسلسل الطبى الامريكى وجدت فى نفسى الرغبة كتابة بعض الملاحظات
اولا انا اشاهد هده المسلسلات ليقينى ان جزء كبير من الخبرة والتعلم لا تاتى عن الطرق التقليدية للتعلم التى تعنى الكتب النظرية انا اتعلم الكثير من التكلم مع المرضى عن انطباعهم الشخصى عن المرض والاعراض وطرق العلاج كدلك احرص على النقاش الطبى المفتعل مع اصدقاءى فى الامور التى تشغلنى ودائما يكون هناك ما كنت افهمه بطريقة غير صائبة او توضيح لفكرة ما لم تكن مكتملة الجوانب .
انا ايضا اتعلم من المسلسلات الطبية ولكن هاوس..........

#من جديد يطل علينا النمودج الامريكى للاشخاص الغير نمطيين الغير مهدبين ولكن الناجحين فى شكل د هاوس .....ولكن احب ان اطمئن الجميع ان هده النوعية من الاشخاص لا توجد فى المجال الطبى (من الممكن ان تتواجد فى الشرطة او فى عصابات المافيا)
لسببين :
اننا(هدا الضمير عائد فى الاساس على اعضاء هيئة التدريس) فى الكلية نركل هده الاشخاص فى مؤخرتها ونقنعهم ان مكانهم خارج المستشفى ...
السبب الثانى ان التعافى والمناعة يعتمد بطريقة كبيرة على الحالة النفسية للمريض التى يحتقرها هاوس فأنا ايضا سأركله فى مؤخرته ادا كان طبيبي المعالج وعاملنى بطريقة غير ادمية حتى لو كان علاجى يملكه هو فقط.....
هدا يتجلى بشده فى القصر العينى حيث انك لو فتحت قلبك للمرضى وتكلمت معهم بطريقة ودية يضع فيك المريض ثقة كبيرة لمجرد انك تقول امريضة كبيرة فى بداية كلامك يا ماما او يا حبيبتى او تقول لشخص كبير انت على دماغى من فوق يا حاج (وادكر اننا كنا نمر انا ونائب مسالك فكان المرضى يبكون له ويقولون له اننا نشفى حين نراك وحين تمر ودلك لانه يمرر لهم شىء من اللطف والمرح على الرغم من انه فى قاعدة الهرم الطبى الوظيفى )
ا يضا احيانا كثيرة يطلب منى مريض ان اقوم انا باجراء العملية له بدلا من الاستاد لمجرد اننى اتجادب معه الحديث وهو لا يعرف اننى لا زلت تحت التمرين وبالكاد اقوم بفتح خراج........
common is common
هدا مثل شائع فى الطب فالطبيب
الناجح لا يفكر فى الامراض النادرة والتى تحدث مرة فى المليون لان هده الشخصيات فى العادة لا تقوم بتشخيص وعلاج الامراض المتكررة

#ايضا يقوم د هاوس بمخالفات طبية غير اخلاقية فى الممارسة الطبية داتها (مثا ان يحقى ورم ما بمادة تصغر من حجم الورم من اجل ان يخدع الجراح فيقوم باستئصال الورم ) وهى تنم عن جهل فظيع حيث انا مثلا عندما يكون الورم اكبر من حجم معين فانه طبقا للاحصائيات والمشاهدة تكون الجراحة غير مفيدة وربما مضرة وليس كما يعتقد انه تقاعس من جانب الجراح .....
# ايضا يظهر هاوس فى العيادة الخارجية يستهزئ بالمرضى لانهم يشتكون من اغراض بسيطة مثل الزغطة والتى من الممكن ان تعوق شخص عن ممارسة حياته وانا لا انسى ان اساتدتى كانوا دائما يدكروننا ان اقصى عقوبة من الممكن ان اتعرض لها هى ان وجدونا نستهزئ او نتعامل بشكل غير لائق مع المرضى ولا انسى المقولة الشهيرة الاستاد جراحة شهير (انا ممكن اممرط بكرامتك الارض فى حالة واحدة فقط ان تسى الى مريض )
انا لا اود ان اكون شاعريا فكثير من الاطباء يعاملون المرضى بسوء ولكن يكون هدا نتيجة للضغط عصبي والطبيب يعلم انه مخطئ وفة غالب الاحيان يعتدر للمريض عند تنبيهه وليس كنظام مقتبع به مثل ما يفعل د هاوس....
فى النهاية فان هدا المسلسل من اسوأ ما شاهدت فى المجال الطبى رغم شهرته ......

هجين

كنت دائما اشرح لخطيبتى الحياة القلقة التى يعيشها اشخاص مثلى فى امبابه وسببها الفجوة الثقافية التى توجد بين الاجيال الجديدة للطبقة المتوسطة والطبقات الادنى التى تعيش جنبا الى جنب فى منطقتى ارض الجمعية .
كنت اقول ان نشأتى فى امبابة تجعلنى اتعامل مع الامور بشئ من الندية ورفض الرضوخ للنمودج الادنى من الحياة على العكس من اقرانى الدين يقنطون اماكن اعلى اجتماعيا لا يوجد فيها هدا الاختلاط الدين يرون من الافضل عدم التعامل مع هده الانماط.
اعتقد ان من يقرأ هدا من الممكن ان يتساءل عن مكان للالتحام والتداخل بين الطبقات المختلفة ولكن فى بعض الاحيان يكون على احد الاطراف ان يفرض احتياره على الاخر.
هده المقدمة كانت للتمهيد لما اود ان اقوله عن التوك التوك.
مع ظهور التوك التوك اتيحت لطبقات اجمتاعية بسيطة يمثلها شباب لم يكملوا تعليمهم او اكملوا قسط بسىط منه امتلاك وسياة تنقل .
ومع الغزو الصينى اصبح من السهل تجهيزه بمكبرات صوتية عالية ولكتها رديئة وهدا يزيد من الضوضاء التى تحدثها.
اعتقد انه من المستحيل ان تنتظر سماع فىروز او ماسى .
وانك فى احسن الاحوال ممكن ان تستمع الى عمرو دياب او محمد فواد.
ودائما سوف تسمع محمود الليثى وعبد الباسط حموده.
مقدار الازعاج الدى يحدثه سائقى التوك التوك غير طبيعى فمن السهل ان يفسد عليك لحظة تأمل او لحظة استمتاع بخاتمة رواية جيدة على انغام سعاد ماسى .
ادكر اننى فى فترات امتحانى كنت ادعو قبل ان انام من ان يوقظنى توك توك لاننى كنت اعانى من الارق وصعوبة فى النوم و ادكر مرة اننى انتباتنى مرة حالة هيستيرية ووجدت نفسى اعنف سائق توك توك من الشرفة بصوت عالى وعنف واستغربت من استجابته لى دون اعتراض.
المشكلة الحقيقة فى اختلاف الافكار والقيم فسائق التوك التوك لا يدرى ما الضرر البالغ الدى يحدثه بالكاسيت او باستخدامه المفرط للكلكس ويتحول المر فى النهاية الى صراع من يفرض رأيه على الاخر.
اجتماعى معمهم فى نفس المنطقة ونشأتى فى امبابة غير المدللة تجعلنى عنيدا فى تقبل وضع كهدا كتأثر منى لشخصية الشاب الامبابى البلطجى الدى لا يخاف ولكن بطريقة هجينة .
فتارة يكون عندي رغبة فى الاشتباك وعدوانية تجاه سائق التوك التوك الدى يقلقلنى واحيانا اخرى اعرف اننى لا انتمى لهده الطريقة واننى على ان اتجنب هدا النوع من الاشتباك .

اهلا بيك يا ريس فى القصر العينى2

استمرارا لطريقة التدوير على المشاكل كما يظن اصدقائي استكملت طريقى .
فى اول يوم لىه فى الجراحة شبكت مع الموظف بتاع الامضاء .بيقول لخطيبتى البسى البالطو والكارنيه علشان تمضى .طبعا انا كنت مستنيه يقول كده ورحت قايله انت بتقولنا نلبس البالطو وانت بتشرب سجاير فى المستشفى .
الراجل حس ان انا كده خرمتله الشورت فى البسين وقلب الوش الميرى اللى كان لابسه وقعد يقولى معلش يا دكتور خليها عليك المرة دي .
المهم ان انا فى اليوم اللى باعده جاللى صدمة نفس الموظف كان بيشرب سجاير ومين اللى كان جنبه...... مدير المستشفى.....طبعا انا حسيت انى انا خسرت كارت ارهاب للموظف ده...بس كل حاجة وليها حل ان شاء الله
الموقف التانى كان فى حوادث المخ والاعصاب وكان فى واحد لطيف بيشرب سجاير من العمال ... طبعا العبد لله راح يكلمه فخرج وقف فى الطرقة ....طبعا فضلت وراه ... قاللى طب اروح فين انا على فكرة ابن القسم ده ومتربي فيه....المهم قولتله لو عايز مشاكل خليك واقف و الحمد لله خرج.....
مشكلة السجاير ده محتاجه حل صارم ومرعب لان كل فئات المستشفى بتشرب سجاير من اول الدكاتره لحد العيانين .....
انا لو رئيس المستشفى كنت عملت خصم كامل للمرتب فى حالة مشاهدة شخص يدخن وخصم نصف المرتب فى حالة الابلاغ عن شخص دون مشاهدته من قبل الادارة المختصة ..... انا عارف انا القانون غبى ويفتح مجال للخوازيق بين الناس بس ده الحل الوحيد علشان المصريين يخافوا........

الاسلاميون الجدد

يا تنين .... جرى ايه يا وحش......اه يا سيس الليل ......

هى ديه الكلمات الاولى اللى ممكن تسمعها من اصدقائى اللى انا مسيمهم الاسلاميين الجدد

صعيدى ......على ......تيوبس

صعيدى :

اوقع تعليق عليه قاله صاحبنا محمود الجعفرى "الواد صعيدى لولا انه متدين كنا لميناه كل يوم من خمارة شكل"..صعيدى عبارة عن مسخرة متحركة ...عندما ترافقه فى الشارع او فى المستشفى فانك سوف تسمعه يقول "يا تنيييييييييييييييين" لكل من تسول له نفسه ان يخطئ امام صعيدى.

على الرغم من دلك فانك سوف تفاجئ بالمرجعية الاسلامية القوية فهو يهوى النقاش مع الاسخاص العلمانين وعلى الرغم من الاختلاف الفكرى فالنقاش يكون مسرحية وعادة بينتهى ان الطرفيين يقعدوا يتريقوا على حاجة ملهاش علاقة بالموضوع والشخص التانى بيبقى متكيف من صعيدى موت... وصعيدى ساعتها بيقول جملته المشهورة"كيفه بقا عندى"

ايضا ستفاجأ بحفاظ صعيدى الفظيع على الصلاة فى اوقاتها ...وحضوره المستمر فى الدروس الدينية ..

ايضا من الممكن ان تكون سعيد الحظ وتحصل ادامك مشكلة او خناقة علشان تعرف من اول وهلة انه مش بيخاف من حد ابدا ممكن تلاقيه واقف بيقول لظابط ممكن اشوف كارنيهك.....او شاب بلطجى بيقوله"انت ياد ما تعرفش تعمل حاجة".....

تيوبس :

شاب مودرن و وسيم هتلاقيه كتير واقف مع بنات هتلاقيه بيجرى ورا واحد او واحد بيجرى وراه فى الكلية...لو كنت عايز تقول كلمتين جد فمن المستحيل ان ده يحصل وتيوبس واقف...

تيوبس ممكن يهزر مع اى حد فى اى وقت وانا دائما بقوله اخرتك هتهزر او تتريقك فى قهوة وهتقوم القهوة كلها تظبطك.

وغالبا سوف تسمع وانت ماشى معاه جملته الشهيرة "جرى ايه يا وحش فى ايه"

سيفاجئك تيوبس بانه بيحب يفهم كل حاجة 100% ويسألك اسئلة محرجة ما تعرفش ترد عليها وتكتشف انك مش فاهم الموضوع ده كويس.

ايضا ستفاجأ بحفاظ تيوبس الفظيع على الصلاة فى اوقاتها ...وحضوره المستمر فى الدروس الدينية ..

ادا كان عندك توجهات ليبرالية فانك سوف تختلف قليلا مع تيوبس وغالبل ايضا النقاش بينتهى بهزار ممكن يستمر بدون مبالغة لشهور....

على :

قدرة على على التهييس تتوقف على وجود تيوبس وصعيدى معاه ...لو كان لوحده فمن الممكن انك تتكلم معاه جد وغالبا هيعجبك رايه لانه شخص متصالح مع نفسه بدرجه مستفزة ...

اما لو كان الثلاثى مكتمل فسوف تشعر انك امام سيرك مكتمل...

على شخص نضيف وابن ناس موت ولكنه يصر على ان يظهر كالمتشردين...

لو حضرت مع على حفلة فى الكلية فهتلاقيه بيزيح الناس من امامه ويملى طبقه بطريقة ملفتة للانظار وعادة بيبقى ماسك ازازة لتر بيبسى فى حين ان بقية الناس بتبقى مكسوفة اللى انا ببقى واحد منهم .....

كمان لو ركبت مع على عربيته الاحدث موديل ستفاجأ عندما يكسر عليه حد فتلاقى على خرج دماغه من العربية ويقوله" ما تحاسب يا وحش دى عليها اقساط"

كل ده كوم ولمل تخش مع على الجامع كوم تانى

اولا هتلاقيه بيوصل الميه لركبه وهو بيتوضأ

هتلاقيه بيصلى عشرين ركعة قبل وبعد كل صلاة حاجات منها سنة وحاجات لله لدرجة اننا بنرخم عليه فى الجامع علشان يخلص ويمشى

ستفاجا بفهم مكتمل من نوع اخر للدين واخلاق شبه مكتملة لاشخاص لا يسرك مظهرهم من بعيد...

ايضا ستفاجأ بمعرفة واسعة واهتمام بالامرو الدينيه...على افكاره تححررية اكثر من تيوبس وصعيدى ولكن لا شك فى ان خلفيتهم الاساسية اسلامية ولكنها دات طابع خاص

حمادة تاريخ

النهاردة وانا فى اخر يوم فى قسم 5 حوادث قريت كلام مكتوب على الحيطة فقولت اللى كاتب الكلام ده واد مختلف وغريب
مكتوب على الحيطة "يا رب من فضلك اشفى كل مريض
حمادة تاريخ
#######010
2008\8\20"
انا تصورى ان حمادة تاريخ ده بلطجى والمرض هده
انا عايز اقول ان البلطجية والشمامين والمدمنين لما بيتعاملوا فى المستشفى وبالدات مع الدكاترة بيبقوا كائنات لطيفة
انا مش بصدق ان العيان اللى لسه كنت باقوله اعمل كدا وما تعملش كدا ويقولى انا تحت امرك يا باشا ده كان بلطجى واتخانق مع شارع وقتل اتنين
انا تصورى انه لما حب يدعى قال الكلام ده وكتبه على الحيطة

يا رب مش عاوز ابقى زي ابن النفيس

فى المستشفى تقسيمتين للدكاترة:
واحد دماغ ولابس نضارة كعب كوباية وفاهم كل حاجة بتحصل جوه العيانوغالبا بيبقى فى اقسام الباطنة ولو لقيت واحد فى قسم الجراحة يبقى تأكد انك هتسمع عنه كلام جامد.انه مثلا بقى جزء من فريق الجراحة فى مستشفى جامعة هارفارد.
والنوع التانى من الدكاترة بيبقى جرئ وقلبه جامدوعادة مشمر القميص لحد نص دراعه وماشى معاه دكاترة بنات صغيرين بيعلمهم حاجة ممكن هى مش تخصصه.
المهم الدكتور ده بيبقى فاهم بس مش اوى بس بيعالج جامد.
برده الامتياز نوعين :
واحد بيتعلم من اللى بيشوفه بس من غير كتب وده غالبا بيدوس كويس فى شغل الممرضيين والعلاج البسيط المعتمد على المشاهدةولكن للاسف الطب اعقد من كده بكتير وبيلاقى فى المراحل اللى فوق كده مش عارف يتعامل لان الطب فى مرحلة مابعد الحضانة معتمد على علم غزير ومعادلات لدرجة انه فى البلاد النضيفة بيمنعوا الدكتور انه يحفظها وبيمسك معاه كتيب فىه ملخص للجرعات والمعادلات لان لو هو حافظ ممكن ينسى لكن الكتاب مش هيغلط.
طبعا عندنا بنحفظ كل حاجة لانك لو فتحت كتاب قدام عيان هيتف عليك وعلشان كده الدكاتره المصريين بره بيسموهم الموسوعة المتحركة.
والنوع التانى نوع مؤمن جدا بالعلم اللى فى الكتب وبيقرا باستمرار بس بيلاقى صعوبة فى الاول انه يطبق الكلام النظرى على الواقع لانه لا يعتمد او يكتفى بالمشاهدة فقط كوسيلة للتعلم ولكنه اما بياخد الخطوة الاولى بيبقى دكتور جامد اوى وغالبا بيخش باطنة او ممكن يفشل ويقف محلك سر عند مرحلة الكتب.
انا بقى على اعتبار انى ترتيبى متقدم وغالبا اللى ترتيبهم متقدم بياخدوا جراحة تخصصية لان مستقبلها احسن بمراحل عاوز احقق المعادلة الصعبة انى ابقى جراح شاطر وفى نفس الوقت ابقى فاهم زى بتوع الباطنة وعلشان كده باقرا كتب الباطنة وقاعد فى اقسام الباطنة معظم الوقت ودكاترة الباطنة لمل بيعرفوا انى انا الاول بيقولولى :ايه يابنى اللى مقعدك معانا.
المهم انى وانا بقرا كتلب "حى بن يقظان " ليوسف زيدان والله خفت لما قريت كده عن ابن النفيس.
واخيرا فى مثل شائع عندنا فى الكلية:
دكتور الباطنة يعرف كل حاجة ومش بيعالج اى حاجة
دكتور الجراحة بيعالج اى جاجة ومش عارف اى حاجة
وفى دكتور مش عارف ولا بيعالج اى حاجة اللى هو دكتور الجلدية

اهلا بيك يا ريس فى القصر العينى

فرق شاسع بيلاحظه اى طبيب امتياز لما ينقل من مكان الكلية الى المستشفى.....
فى الكلية معظم الدنيا حلوة...شباب وبنات ومحاضرات فى اماكن نظيفة نسبيا ومحلات اكل وحفلات ومعظم الناس بتقولك يا دكتور.....
تخلص الكلية وتخش المستشفى وتواجه الواقع الاليم...فى الاول بتتفرج على اللى بيحصل وتقول لا انا مش هسكت على الغلط....خناقة فى التانية بتلاقى نفسك زهقت وبقيت جزء من صفيحة الزبالة.............
عمال بيشربوا سجاير فى العمليات
عمال امن بياخدوا فلوس من الناس علشان ىدخلوهم زيارة
امتياز قديم بيشرب سجايرفى كشك العظام
نايب جراحة تقف تشرحله ان العيان ده هيموت وهو يقولك لاده ممكن يستنى 6 ,7ساعات
ممرضة بتشغل اغانى على الموبايل جو العملية
ممرضات بتضرب حقن
عامل نظافة يشد كانيولة من سرير عيان من غير ما يعرف
نايب اشعة يخرم شريان لعيان ويسيبه ويمشى
نايب جراحة يعمل عملية مش بتاعته ويكحول العيان
ممرضة تقولها عايز حاجة تقولك ماهى هناك اهى
واحدة امتياز تقولك انها بتظبت الاداريين وان الادارى هو اللى بيمضى مكانها
نايب قلب طوارى طلع يشرب حاجة من الساعة3 لحد الساعة8
ممرض يقولك اصل انا الى بعلم الدكاترة
ممرض بيهزر مع دكتور ان العيانه كبيرة وكده كده هتموت ماتعملها العملية وتموت جوه والكلام ده كله ادام المريضة
ممرض تانى مش عايز يلبس جوانتيىات وهو بيشتغل
الواحد فى الاول كان بيتخانق ويكتب شكاوى بس اكتشفت لو كملت كده على اخر الامتياز هكون معادى المستشفى كلها
الحل الوحيد للقصر العينى ....قنبلة ونبنى من جديد على نظافة

الطبقة الوسطى

على الرغم من ان الواحد بيدين للطبقة الوسطى اللى هو عايش فيها بفضل كبير ابتداء من ان تحفظها الفظيع والخوف من المستقبل الكامن جوه افرادها دايما خلتنى ابقى شاب محترم ومتعلم واجيب 98 فى الثانوية العامة بس ساعات الواحد بيحس انه كان مفروض يبقى فاكك وضايع شويه عن كده.
ساعات بيحس انه كان مفروض يبقى عنده حرية اكتر تبدأمن سن اصغر (على اعتبار ان الواحد بدأيشم نفسه شويه فى الجامعة) ولكن برده فى الجامعة كنت دحيح(مش اوي يعنى نقلا عن اصحابى) وطلعت الاول.
انا حسيت الاحساس ده وانا فى اسوان فى نص النيل لقييت اللى انت شايفه فى الصورة اللى فوق(على فكرة انا اللى مصورها)عيال عندها 15 سنة كل واحد قاعد على خشبة وماسك فى ايده شبشبه وماشى زى الريح مع التيار طبعا العيال ده حسه احساس حرية وانطلاق ابن كلب .
طبعا علشان اعمل زى العيال ده وانا عندى 15(على الرغم من انا لعبت سباحة 7سنين)كان لازم يبقى شوية حاجات:
1-ان اكون فى البسين ال25 (علشان ال50كبير برده على حاجه خطرة زى ده)
2-اكون لابس عوامتبن
3-بابا يأجر اتنين منقدين على جانبى الحمام
4-ماما متكونش عارفه
5-انى اكون لوحدى فى الحمام على شان ماحدش يعمل موجه تقلبنى
الخلاصة ده شئ مستحيل
فى النهاية انا مبسوط الحمد لله بس الناس لازم تفك شوية ده انا اعرف واحد دكتور مابيركبش العربية بالليل علشان والدته بتخاف عليه...
يلا حصل خير

طمنى يادكتور بابا هيتحجز

مش عارف انا كنت متردد قبل ما اكتب بس امبارح وانا بتكلم مع واحد صحبى لقيت عنده نفس الشعور فتأكدت.
فى اول كام يوم كان لما واحد يجيب ابوه (غالبا بيبقى متجوز وابوه كبير فى السن) الطوارئ كنت باطمنه واقوله هيبقى كويس ويروح معاكم كان رد فعله بيبقى غريب وكان بيسكت.
مرة فى التانية لمست معايا وفهمت الفولة.
معظمهم جاى يتخلص من ابوه وخدمته علشان يفضى لمراته ومفيش مانع عياله
امبارح بس كان فى زوجة وشها مكشوف شوية كان ابو جوزها راجل كبير ورجله مقطوعة وكانت كل شوية تسالنى هو هيتحجز يادكتور وانا كنت باقولها مش عارف اسألى النائب.
وانا بتكلم مع النائب قالى بعد ما الراجل ياخد كيس الدم يخرج. الست كانت واقفة ورانا وسمعت ومش عارف ليه الناس بتفتكر ان انا الى بياخد القرارات
وجت تكلمنى ان كده ماينفعش و مينفعش يروح .فى الاول كنت باتكلم معاهم بالراحة وبعدين لما الراجل جه يكلمنى هو كمان ان الحالة حرجة و ان الدكتور فلان الفلانى قال انه لازم يبقى فين انا اتنرفزت منه و من بجاحته وانه بيعمل حوار علشان يخلص من ابوه ولبست الوش الخشب وشاورتله على النائب وقوللتله روح قوله الكلام ده.....
الراجل سكت لانه عارف ان النائب هيبهدله لو قاله كده وانا خلصت الشفت بتاعى وروحت مكتئب عمال افكر ازاى اخلى ابنى مايعملش معايا كده.......

حسبي الله ونعم الوكيل:بعد كل ده كوكتيل

medical report
male patient ,mohammed ali abd ellfatah ,34 years old living in imbaba working as porter complaining of abdominal pain.
the pain is RT lumbar,colicy in nature,reffer to the back,1 hour duration,no special increasing or decreasing factors
there is history of ureteric stone on year ago.
the condition is associated with vomitting and hematuria.
النائب:اديله كوكتيل برده

الله ينعل ابو السياحة والقرية النوبية

قبل ما اروح الاقصر واسوان بيوم واحد كنت قاعد على القهوة مع صحابى اللى طلعوا الرحلة قبل كده,قاللولى خلى بالك اما تروح القرية النوبية ماتكلش جامد لانك حتلاقى واحد واقف على باب البيت اللى مستضيفكم وهيسألك:
كلت كام فطيرة؟شربت ايه؟
ساعتها ما صدقتش.ولما رحت شفت بعينى ماحدش قاللى.
الطبيعة السياحية للمنطقة حولت الناس ممثلين وتجار وبدؤا يمثلوا حياتهم مش يعيشوها علشان الفلوس...
بداية بعم رجائى مندوب القرية النوبية اللى قعد طول الطريق فى النيل يقول انه مش زى المصريين -اللى هما احنا-كلمته واحده وانه متجوز اثنين من وهو عنده 18وانه متحمل المسئولية مش زينا.المهم اول لما وصلنا شوفت موقف مكيفنى لحد دلوقتى:
سايح ركب جمل علشان يصور ولما نزل طلع جنيه واحد واداه للراجل اللى ماكنش مصدق وقعد يبص فيه بإستغراب-على فكرة الفوج بتاعنا ركب الجمال ب 20 جنيه الواحد-وبعدين قعد يكلمه شوية لغاية لما السايح طلع 2جنيه كمان ومشى من غير كلام.
ولما دخلنا البيت وكنا خلاص دفعنا قعدنا 45دقيقة بنبص لبعض مستنيين الشاى ومية لدرجة انى قمت ادور على حد علشان اشرب فقالى واحد "اشرب من الزير".
وانا راجع عديت على مكان عارضين فيه حاجات للبيع,وكان فى شلة بتهزر مع بنت نوبية صغيرة,فجه واحد وقالوهم بهزار ان التصوير معاها بفلوس .هو فعلا كان بيهزر بس انا حسيت لو كان الموضوع فى ايده كان خلى الناس تدفع فعلا.
وانا بتفرج عجبنى عقد قولت اجيبه لخطيبتى -وكنت سألت عليه قبل كده فى مكان تانى وكان ب40ج-فسألت البنت اللى واقفة:
-بكام العقد ده؟
-80ج
-ليه ياعنى؟
-ده عضم جمل
-يعنى ايه؟
-عضم جمل ,مش عارف عضم الجمل
-بس انا شوفته قبل كده ب40ج
-روح اشتريه من هناك.
المهم ان انا ابتهدلت جوه البيت النوبى واتفقعت وماكانش فيه حاجة عدلة غير فرقة نوبية جت وغنت شوية.
بعد كده خرجنا نمشى شوية فى القرية ودخلت محل بيبيع رسومات,فسألت الراجل:
-بكام اللوحة دى
-80
-ليه يا عم؟هى رسم مين؟
رد الرجل بثقة -شريف
انا قلت ف سرى ده اكيد فنان النوبة الاول فسألته-مين شريف ده
رد الراجل -اخويا
بصيت له وضحكت وقلت له -هو انا المفروض ابقى عارف شريف
المهم قولت له ان انا باشترى لوح لبيكار ومتبروزة من مصر بحوالى 40
فرد علي وافحمنى-يا باشا اللوحة اللى انت هاتأخدها مش هتلاقيها مع حد تانى.
اخر المواقف اللطيفة فى القرية لما دخلنا محل تماثيل فمسكت تمثال الحكيم الافريقى-مسايا-وسالت عن سعره فرد الشاب النوبى ب800ج وقاللى ان المنطقة دى من المحل خط احمر,للسياح فقط علشان المصري مش هيقدرها,مع ان عمرو اخويا عنده التمثال من زمان ولا اعتقد ان عمرو دفع فيه اكتر من 100ج
.....الله ينعل ابو السياحة اللى تعمل فى الناس كده ....

aziz maraka

لا اعرف عنه الكثير ولكن اغنياته التى سمعتها بالصدفة تكفلت ببهجة الاسابيع السابقة

شكرا "دى بونو"

اثناء رحلة العودة من الجنوب بعد زيارة ممتعة اشتملت الاقصرواسوان وسوهاج والتى امتدت لساعات طويلة ما بين ثرثرة مع صديقى سميح وقراءة الجرائد ومحمد المخزنجى .اعطانى الفراغ فرصة للتأمل على غير عادتى وكنت قد انتهيت من قراءة التغطية الصحفية لاضراب الصيادلة.....كنت فى بداية الامر مبسوط لحدوث شىء يحرج الحكومة المصرية كرد فعل طبيعى من اى مواطن مصرى تجاه سياساتها....ولكن فى محاولة لجعل التفكير اكثر ايداعية على طريقة "ادوارد دى بونو" صاحب كتاب القبعات الست للتفكير"قمت بطرح سوال معاكس:
لماذا لا يكون هذا هو السيناريوالمرجو لدى الحكومة او النظام؟
واندهشت لمل لم اجد صعوبة فى تحليل الموقف على هذا النحو كالاتى:
لفت نظرى الطريقة المستفزة لتعديل قانون الضرائب والتى تلزم الصيادلة بالدفاتاتر وتطبيق النظام باثر رجعى على السنوات المنقضية ...كما لو كانت الحكومة بتقول "اه هى عافية بقى" وتاكيد ذلك بتصريحات احمد نظيف ان الحكومة لن تتراجع عن القانون...
فيكون رد الفعل هو الاضراب والذى من الممكن ان تستخدمه الحكومة المصرية فى جعل صورتها والنظام اكثر ديمقراطية وتبدا فى رحلة مفاوضات مع الصيادلة للتعديل والذى كان من الممكن ان يكون البداية دون اثارة الذوبعة او بتدخل الرئيس كونه الملاذ الاخير للمظلومين ليحل الموضوع بأوامر عليا تضعه فى مرتبة اعلى من سياسات حكومته.
لا اعرف مدى صحة هذا السيناريو...ولكن فى النهاية شكرا "دى بونو"

حيثيات التدوين

رغم التاكيد على ما سبق ذكره من اسباب التدوين

ولكن اسباب اخرى كان لها عامل

• كنت بتغاظ جدا لما يقعدوا يتكلموا عن المعارك الدامية بين مدوننين من امثال بيسو وارمن والصارم الحاسم
• انا خلصت سادسة طب وبقيت فاضى و صايع لحد الامتياز التى هى فترة اهم سماتها الفراغ خصوصا بالنسبة لطالب دحيح ذى
• علشان اطلع مخزون الكراهية اللى اتجمع جوايا من امتحانات الشفوى التى تكون احيانا احدى دوافع التشرد الاطفالى والعمليات الانتحارية ضد اهداف قصر عينينية على راسها مستشفى الباطنة
• الاقى حد اتكلم معاه عن الفن التشكيلى والادب ومافيش مانع من قلة الادب على اساس ان احتمالية انك تلاقيه فى القصر العينى شبه منعدم فى ظل سياسة الكلية احفظ اكتر فرصتك فى التعيين تكتر
• واخيرا ان الايد البطالة نجسة
  

بعد تفكير عميق ومضنى استمر سنوات طويلة تم خلالها دراسة جوانب القوة والضعف والسلبيات والايجابيات لعملية التدوين..........

وبعد الحاح شديد من محمود عزت و عمرو عزت اصحاب مدونة نور و ما بدا لى وتزامنا مع اعتلاء اوباما سدة الحكم ...................

قررت التدوين